Leughadh - Naidheachdan test questions - Nàiseanta 4 Gàidhlig Revision

Thàinig fios on Riaghaltas an-diugh gu bheil rannsachadh poblach gu bhith ann a thaobh an rathaid timcheall Loch Liapaig. Tha leth-cheud mìle càr a' siubhal air an rathad gach bliadhna, ach le droch staid an rathaid chan urrainn dhaibh a dhol nas luaithe na 30 no 40 mìle san uair.

Thuirt fear-labhairt bho choimhearsnachd ionadail Loch Liapaig gun robh iad air leth toilichte an naidheachd a chluinntinn. Thuirt e cuideachd gun robh iad air a bhith a' gearain o chionn fichead bliadhna co-dhiù mu dhroch staid an rathaid agus gun robh iomadach tubaist air a bhith air an rathad.

Thuirt neach-labhairt on riaghaltas gun robh an t-àm ann rudeigin a dhèanamh mun rathad seo. Thuirt e gun robh am pàrtaidh aige dìreach air faighinn a-steach mar riaghaltas agus gum b' e seo aon de na molaidhean aca ron taghadh nàiseanta. Bha e an dòchas gum biodh rathad brèagha ùr ann taobh a-staigh deich bliadhna.

Bha an luchd-labhairt bhon AA agus bhon RAC le chèile toilichte an naidheachd a chluinntinn. Thuirt Anna NicDhòmhnaill bhon AA gun dèanadh rathad ùr feum do dh'eaconamaidh na Gàidhealtachd. Bhiodh cothrom aig dràibhearan siubhal na bu luaithe agus bhiodh an ùine eadar Glaschu agus An Gearastan air a ghearradh gu mòr. Bha ise den bheachd gun sàbhaladh dràibhearan leth-uair a thìde air an rathad ùr.

1

Dè thuirt an riaghaltas mun rathad timcheall Loch Liapaig?

Chan eil rannsachadh poblach gu bhith ann.

Tha rathad ùr gu bhith ann.

Tha rannsachadh poblach gu bhith ann.

2

Carson nach urrainn do dhràibhearan a dhol nas luaithe na 30 no 40 mìle san uair?

Cus chaorach.

Droch staid an rathaid.

Cus trafaig.

3

Dè thuirt fear-labhairt bho choimhearsnachd ionadail Loch Liapaig?

Tha iad gu math fiadhaich mun naidheachd.

Tha iad gu math toilichte mun naidheachd.

Tha iad a' smaoineachadh nach atharraich seo càil.

4

Dè na gearain a bha aig muinntir Loch Liapaig?

Tha iad air a bhith a' gearain o chionn deich bliadhna mu dhroch staid an rathaid agus tha iomadach tubaist air a bhith air an rathad.

Tha iad air a bhith a' gearain o chionn fichead bliadhna mu dhroch staid an rathaid agus tha mòran thubaistean air a bhith air an rathad.

Tha iad air a bhith a' gearain o chionn fichead bliadhna mu dhroch staid an rathaid agus tha fichead tubaist air a bhith air an rathad.

5

Dè thuirt neach-labhairt on riaghaltas?

Nach robh iad a' dol a dhèanamh dad mun rathad seo.

Gun robh còir aig muinntir a' bhaile sgur a ghearan mun rathad seo.

Gun robh làn àm ann rudeigin a dhèanamh mun rathad seo.

6

Carson nach do rinn an riaghaltas dad ron seo?

Bha iad dìreach air faighinn a-steach mar riaghaltas.

Tha e doirbh airgead fhaighinn airson pròiseact mar seo.

B' e baile gu math beag a bha ann am Baile Liapaig.

7

Dè tha an riaghaltas an dòchas a thachras taobh a-staigh deich bliadhna?

Gum bi baile ùr ann.

Gum bi rathad brèagha ùr ann.

Gum bi an aon riaghaltas ann fhathast.

8

Dè tha an AA ag ràdh mun chùis?

Bheir rathad ùr cus chàraichean don Ghàidhealtachd.

Nì rathad ùr milleadh air sìth na Gàidhealtachd.

Nì rathad ùr feum do dh'eaconamaidh na Gàidhealtachd.

9

Dè am feum a nì rathad ùr do dhràibhearan?

Faodaidh iad siubhal nas luaithe ach bidh an ùine eadar àitean a' fàs gu mòr.

Faodaidh iad siubhal nas luaithe agus bidh an ùine eadar àitean air a ghearradh gu mòr.

Faodaidh iad siubhal aig an aon astar agus bidh an ùine eadar àitean air a ghearradh gu mòr.

10

Dè an ùine a tha daoine a' dol a shàbhaladh air an turas eadar Glaschu agus A' Ghearastan?

Cairteal na h-uarach.

Uair a thìde.

Leth-uair a thìde.

11

Nad bheachd, càit an nochdadh earrann mar seo?

Air duilleag-aghaidh pàipear-naidheachd nàiseanta.

Ann an iris mu Loch Liapaig.

Ann am pàipear-naidheachd ionadail.

12

Saoil cò a bu mhotha dhan deach an earrann seo a sgrìobhadh?

Daoine a tha a’ fuireach ann an sgìre Loch Liapaig.

Daoine a tha a’ dol a Loch Liapaig air saor-làithean.

Buill-pàrlamaid Pàrlamaid na h-Alba.